#27 Hasrat

den ghaso dah tak lamo dah la nyawo den ni haa. banyak bona kejadian tragis melando kebelakangan ni haha..

semalam nak eksiden laie. apo bondo la diorang ni. ado signal tak nak guno. nasib baik den cokap ngelak. kot tak, arwah lagi duit den nak repair pintu alza pulak. ponek den ngumpo duit nak dapek an alza tu.. kot insiden laie, mau nyo tak jadi macam kiki..

actually den dah persiapkan sejumlah uwang untuk tujuan menajo seseorang untuk belajar paragliding. supayo kalau den dah tuo esok ado yang mewarisi payung firebird den tu. sayang nak jual kt orang.

hajat eh bosa nak belajar terobang macam den kan. raso eh tak salah mano kalau den bantu dio sikit2. alaahh..den pun belajar bukannyo kono bayar apo2. datang buek muko tembok yo. lopeh tu fly la kot ado yg sudi nak guide kan.

aritu den janji bawak dio tandem kalau dio dapek dekan. tp mano sampai hati nak biar dio tunggu lamo. buek eh den kiok dulu sebolom dio dapek dekan tu kan ko dah terkilan. mati colik mato den kang. sudah eh den bawak la dulu aritu walau pun bongih2 den mo dio. dapek gak dio meraso duo kali tandem.

ni skrg den raso macam "lantak la kau" pun ado. payah nak mikir an. den paling pantang orang nuduh den macam-macam. kalau bondo den buek tu takpo la nak nuduh-nuduh. ni tak tontu ujung pangka nak gak fitnah nuduh den memacam. baik den abaikan orang macam ni. bangso tak soda diuntung. tak cukup nyakitkan ati den, dah maafkan pun buek laie. sekarang ni, memang den tak maafkan sampai bebilo. sobab tuduhan yang sangat tak tercapai kek akal den nan satu ni. kiro adil la den pun dah maki dio sobab goma menuduh kan. tapi maki tak samo ngan fitnah weii haha.. lantak la kau ..!

jadi eh hasrat asal den tu den bungkuih yo la. baik den nyimpan duit bawak anak buah den jejalan kan. lagipun dio tu sapo, tetibo nak wujud dalam idup den. dah la emosi. den laie lamo kawan ngn A, B, C, D segalo tu tetibo dio baru muncul, then dio nak angin2 lak pasal A,B,C,D tu. tak soda diri. bilo den buek perkaro samo, pandai lak dio kuang ajar mo den. ni la jonih bangso tak soda diuntung. dio raso dio bagus padahal sebona eh mental eh problem.

den raso lagi tonang jiwo den maso samo A, B, C , D segalo dulu tu. takdo isu pun den nak pi mano dengan sapo sobab diorang tau den macamano. Ini tidak..baru setahun duo kona den dah bajet-bajet kekonon den tak buleh nak kawan mo sesapo. lopeh tu bebajet nak suh den faham keluargo dio sorang. orang gilo. lantak kau la haih. sekarang tonang jiwo den. takdo ekau.

den ponah tanyo "macamana la kau boleh wujud dalam hidup aku ni.."
dan dio baleh "aku lagi pelik macamana orang macam kau boleh lahir kat dunia ni.."
whoaa lawan kerja Tuhan beb..haha. tepuk tangan ..

aku..takkan maafkan kau sampai bila-bila yang aku rasakan perlu.